O Plan Galego de Investigación, Innovación e Crecemento (I2C) 2011-2015, promovido pola Consellería de Economía e Industria, contempla o reforzo das Oficinas de Transferencia de Resultados de Investigación (OTRI) e dos Servizos Xerais de Apoio á Investigación "polo seu papel dinamizador e, en moitos casos, mesmo iniciador dos procesos de valorización do coñecemento producido polas universidades galegas, procesos que consideramos imprescindibles para garantir a competitividade e o crecemento da nosa economía”, segundo expuxo o director xeral de I+D+i, Ricardo Capilla, durante a súa intervención na Conferencia RedOTRI 2011.

Neste encontro, do que o Campus de Ourense da Universidade de Vigo é anfitrión este ano, participan técnicos de transferencia de 70 universidades españolas.

"O I2C adoptará as medidas necesarias para superar o anterior modelo, no que a xestión dos servizos de apoio á investigación se consideraba unha actividade secundaria e dispersa, e consolidar un novo modelo no que o soporte á investigación se organiza como un sistema integral, profesionalizado e unificado”, explicou o director xeral de I+D+i, que aclarou que estas medidas se enmarcan no eixo estratéxico do I2C denominado Sistema integral de apoio á investigación.

Capilla fixo fincapé no interese da Consellería de Economía e Industria en incentivar a posta en marcha de proxectos de alto impacto en ámbitos de coñecemento estratéxicos para Galicia a través de sinerxias entre os axentes de innovación galegos. "A cooperación é fundamental para levar a cabo proxectos de envergadura que permitan, entre outras cousas, acceder a financiamento europeo coma o que temos ao dispor mediante o Fondo Tecnolóxico, aínda moi desaproveitado polos axentes galegos”, explicou, ao que engadiu que o traballo das OTRIs é moi importante para lograr conectar intereses, necesidades e capacidades entre as universidades e as empresas.

Durante a súa presentación, Capilla pediulles aos técnicos de transferencia das universidades galegas o seu apoio para que estas se sumen ao cambio cultural promovido polo I2C, baseado na unión de investigación e innovación con espírito emprendedor e cunha perspectiva baseada na colaboración, de maneira que os centros de coñecemento sexan capaces de facer compatible a súa traxectoria de calidade investigadora cunha maior capacidade de valorización.

"O Plan Galego establece unha nova e necesaria concepción da excelencia investigadora, na que se introduce como elemento avaliador fundamental a transferencia de resultados e, polo tanto, a capacidade para orientalos ao mercado e que teñan a súa correspondente tradución en termos de competitividade”, expresou o director xeral, quen afirmou que a valoración do papel concreto das universidades no conxunto do Sistema Galego de Innovación queda moi clara na distribución orzamentaria do novo Plan para o exercicio 2011.

Do total dos recursos económicos previstos, un 35%, é dicir, máis de 67 millóns de euros, irán destinados ás tres universidades galegas, cunha clara expectativa de impacto directo no sector produtivo a través dunha intensificación da cantidade e da calidade de transferencia de resultados á empresa. Neste sentido, unha das liñas de actuación que materializarán este investimento será o impulso á creación de unidades mixtas formadas por grupos de investigación e empresas.